Superliga 25-turidan o‘rin olgan “Paxtakor” – “Qizilqum” (6:0) o‘yinidan so‘ng mehmonlar bosh murabbiyi Nikola Lazarevich uchrashuvdagi xatolar, yozda seleksiya ishlarida jamoa sust harakat qilgani va so‘nggi turdan so‘ng jamoadan ketishi haqida gapirdi.

“Himoyadagi xatolar bizga qimmatga tushdi. Raqib birinchi golidan keyin tezda ikkinchisini ham urdi. Bu bizni futbolchilarni ruhan “esankiratib qo‘ydi”. Raqibning darajasi va sifati yuqori. Bu chempion jamoa. Tarkibida sifatli futbolchilar bor”, - dedi Lazarevich.

“Balki futbolchilar mavsum yakunlanishini kutishayotgandir. Ularning o‘z vazifalari bor. To‘g‘ri, ular tajribali futbolchilar, ammo ularni men yig‘maganman. Agar jamoani men yiqqanimda boshqa gap edi. Boshqalar yozda tarkiblarini kuchaytirishganda, biz yozda hech kimni olmadik. Seleksiya qilinmadi”.

“Rahbariyat bilan gaplashib oldim, mavsum yakunida jamoadan ketaman. “Surxon”ga qarshi o‘yindan keyin ketishim haqida qaror qabul qilib bo‘lgan edim. “So‘g‘diyona”ga qarshi o‘yin klubdagi oxirgi o‘yinim”.