Xabaringiz bor, O‘zbekiston futbol assotsiatsiyasi Toshkent viloyatida terma jamoalar uchun markaz tashkil etmoqda. Ushbu markazni xalqaro standartlar asosida bunyod etish, jihozlash va faoliyatini yo‘lga qo‘yish maqsadida bir nechta davlatlarning tajribalari o‘rganilmoqda.

Bugun O‘FA ishchi guruhi futbol infratuzilmasi bilan tanishish, maydonlar tashkil etishning zamonaviy standartini o‘rganish, hududlarda bolalar va ommaviy futbolni rivojlantirish, murabbiylar ta’limi va bir qator yo‘nalishlar bo‘yicha tajriba oshirish maqsadida Vengriya futbol federasiyasida bo‘ldilar.

Dastlab federasiyaga tegishli terma jamoalar markazi o‘rganildi. Mahalliy mutaxassislar xalqaro standartlar talabidagi maydonlarni tashkil etish, maysalarni parvarishlash, yoritish tizimi, stadionning texnik-xavfsizlik tomonlarini to‘g‘ri yo‘lga qo‘yish borasidagi tajribalari bilan bo‘lishdilar. Shuningdek, mashg‘ulot va asosiy maydonlar, tribunalar va unga tutash hududlarni qurish hamda maysa parvarishiga aloqador texnikalardan foydalanish bo‘yicha Vengriya andazasi o‘rganildi.

Yurtimizda qad rostlaydigan bazada ham zamonaviy restoran, reabilitasiya va tibbiyot markazi, mashg‘ulotlar zali, yopiq sport kompleksi va konferensiya xonalarini jihozlash bo‘yicha kerakli tavsiyalar olindi. Bundan tashqari, terma jamoalar markazida joylashishi ko‘zda tutilgan yashil hudud va futbolchilar dam olish maskanining loyihasiga qo‘shimchalar kiritildi.

Shuningdek, bugungi uchrashuv davomida Vengriya futbol federasiyasi vise-prezidenti Sandor Berzi ishtirokida uchrashuv bo‘lib o‘tdi. Tomonlar ikki mamlakatda futbolni rivojlantirish, uning ommaviyligini oshirish, ayollar va bolalar futboli yo‘nalishida hamkorlikni kengaytirish, murabbiylar ta’limi va kadrlar tayyorlash masalalari muhokama etildi. Bu borada har ikki taraf vakillari o‘z tajribalari bilan o‘rtoqlashdilar.

Uchrashuv yakunida ikki davlat futbol tashkilotlari mutasaddilari kelgusida ham keng doiradagi hamkorlikni davom ettirish bo‘yicha kelishib oldilar.