Iordaniyaning Amman shahrida boks bo‘yicha Osiyo chempionatining final bahslari 12 noyabr, shanba kuni bo‘lib o‘tmoqda.

80 vazn toifasida O‘zbekiston sharafini himoya qilgan Odiljon Aslonov iordaniyalik Hussayn Eyshashga qarshi ringga ko‘tarildi.

Hamyurtimiz birinchi bo‘limda to‘liq ustunlikka erishdi, hatto raqibni bir marta nokdaunga tushirdi. Ammo hakamlarning faqat 3 nafari ustunlikni Aslonovga berishdi.

Ikkinchi bo‘limda esa vaziyat tenglashdi. Ringdagi hakam bir marta mezbon sportchi foydasiga nokdaun qayd etdi. Bu esa yon hakamlarga qo‘l keldi va ularning barchasi bu raundda ustunlikni Hussaynga berishdi.

Uchinchi bo‘limda vatandoshimiz vaziyatni o‘zgartirishga harakat qildi. Ammo mezbon sportchini chempion qilish missiyasi to‘liq bajarildi. Aslonov esa kumush medalga sazovor bo‘ldi.

Shu tariqa, O‘zbekiston erkaklar terma jamoasi 4ta oltin medaldan so‘ng ilk kumushni qo‘lga kiritdi.