Иорданиянинг Амман шаҳрида бокс бўйича Осиё чемпионатининг финал баҳслари 12 ноябрь, шанба куни бўлиб ўтмоқда.

80 вазн тоифасида Ўзбекистон шарафини ҳимоя қилган Одилжон Аслонов иорданиялик Ҳуссайн Эйшашга қарши рингга кўтарилди.

Ҳамюртимиз биринчи бўлимда тўлиқ устунликка эришди, ҳатто рақибни бир марта нокдаунга туширди. Аммо ҳакамларнинг фақат 3 нафари устунликни Аслоновга беришди.

Иккинчи бўлимда эса вазият тенглашди. Рингдаги ҳакам бир марта мезбон спортчи фойдасига нокдаун қайд этди. Бу эса ён ҳакамларга қўл келди ва уларнинг барчаси бу раундда устунликни Ҳуссайнга беришди.

Учинчи бўлимда ватандошимиз вазиятни ўзгартиришга ҳаракат қилди. Аммо мезбон спортчини чемпион қилиш миссияси тўлиқ бажарилди. Аслонов эса кумуш медалга сазовор бўлди.

Шу тариқа, Ўзбекистон эркаклар терма жамоаси 4та олтин медалдан сўнг илк кумушни қўлга киритди.