Futbol bo‘yicha Ispaniya terma jamoasi bosh murabbiyi Luis Enrike “Barselona”ning tayanch yarim himoyachisi Serxio Buskets haqida o‘z fikri bilan o‘rtoqlashdi va uni “Katta dubulg‘a” turkumiga kiruvchi turnirlar 22 karra g‘olib Rafael Nadal bilan solishtirdi.
“Mening maqsadim Busketsni boshqa jahon chempionatida o‘ynashga ishontirish. Men hazillashganim yo‘q, men unga allaqachon aytdim. U Rafa Nadalga o‘xshaydi. Uning Federer va Jokovich bilan bir qatorda tarixdagi eng yaxshisi bo‘lganiga va shunday bo‘lishiga shubha bormi? Agar biz jahon chempionatida o‘zimiz xohlagandek o‘ynay olsak, raqib maydonida to‘pni nazorat qila olsak, Buskets dunyoda birinchi bo‘lgan o‘ziga xos Rafa Nadalga aylanadi”, — dedi Enrike matbuot anjumanida.