"PSJ" hujumchisi Kilian Mbappe hozirgi jamoasidan norozi, shu sababli futbolchi jamoadagi kelajagiga ishonchi komil emas.
L'Équipe nashrining yozishicha, uning g‘azablanishiga parijliklar rahbariyatining transfer bozoridagi faoliyatidan noroziligidan tashqari, maoshlarning kechikishi sabab bo‘lgan.
Qayd etilishicha, oktyabr oyi boshidagi "Benfika" bilan o‘yin oldidan fransiyalik hujumchi sentyabr oyidagi maoshi hali hisob raqamiga o‘tkazilmaganini payqagan. Mbappening noroziligi haqidagi ma’lumotlar matbuotga sizib chiqqanidan keyin futbolchi haligacha pul olmagan edi. Oradan bir-ikki kun o‘tib futbolchiga maoshining faqat bir qismi to‘langan. Uning atrofidagilar "PSJ" rahbariyatidan javob talab qilishda davom etdi, ammo ular tomonidan berilgan tushuntirishlarning birortasidan ham qoniqmadi. Ba’zilar hisoblar bilan bog‘liq muammolarni, boshqalari - FFP bilan bog‘liq muammolarni ko‘rsatdilar.
O‘shandan buyon muammo hal bo‘ldi, Mbappening vakillari vaziyat bo‘yicha qo‘shimcha izoh berishdan bosh tortdilar. Parij giganti matbuot xizmati OAVga futbolchiga shartnoma bo‘yicha kelishilgan barcha summalar to‘langanini ma’lum qildi va kechikishni barcha klublarda bo‘ladigan oddiy hodisa deb atadi.
