"ПСЖ" ҳужумчиси Килиан Мбаппе ҳозирги жамоасидан норози, шу сабабли футболчи жамоадаги келажагига ишончи комил эмас.

L'Équipe нашрининг ёзишича, унинг ғазабланишига парижликлар раҳбариятининг трансфер бозоридаги фаолиятидан норозилигидан ташқари, маошларнинг кечикиши сабаб бўлган.

Қайд этилишича, октябрь ойи бошидаги "Бенфика" билан ўйин олдидан франциялик ҳужумчи сентябрь ойидаги маоши ҳали ҳисоб рақамига ўтказилмаганини пайқаган. Мбаппенинг норозилиги ҳақидаги маълумотлар матбуотга сизиб чиққанидан кейин футболчи ҳалигача пул олмаган эди. Орадан бир-икки кун ўтиб футболчига маошининг фақат бир қисми тўланган. Унинг атрофидагилар "ПСЖ" раҳбариятидан жавоб талаб қилишда давом этди, аммо улар томонидан берилган тушунтиришларнинг бирортасидан ҳам қониқмади. Баъзилар ҳисоблар билан боғлиқ муаммоларни, бошқалари - FFP билан боғлиқ муаммоларни кўрсатдилар.

Ўшандан буён муаммо ҳал бўлди, Мбаппенинг вакиллари вазият бўйича қўшимча изоҳ беришдан бош тортдилар. Париж гиганти матбуот хизмати ОАВга футболчига шартнома бўйича келишилган барча суммалар тўланганини маълум қилди ва кечикишни барча клубларда бўладиган оддий ҳодиса деб атади.