Londonning "Arsenal" klubi qishki ta’til davomida Birlashgan Arab Amirliklarining Dubay shahrida o‘rtoqlik o‘yinlari o‘tkazadi. Bu haqida avval ham xabar bergan edik. Ikki bahsdan iborat turnir Dubay Superkubogi deb nomlanadi va "Lion" va "Milan" londonliklarga raqib bo‘ladi.
"To‘pchilar" bu turnirdagi ilk bahsda, 8 dekabr kuni, Fransiyaning "Lion" klubiga qarshi chiqadi. 13 dekabrda esa Italiyaning amaldagi chempioni "Milan", APL yetakchisi bilan kuch sinashib ko‘radi. Ushbu kichik musobaqada "Liverpul" ham qatnashishi ko‘zda tutilgan. Biroq, mersisaydliklar o‘zining APLdagi raqibi bo‘lgan Mikel Arteta jamoasi bilan ӯynamaydi.
Ushbu turnirdan ko‘zlangan asosiy maqsad 6 haftalik tanaffus vaqtida Jahon chempionatiga tanlab olinmagan futbolchilarning sport formasini saqlab turishdan iborat. Shu tufayli "Arsenal" tez orada Dubayga parvoz qiladi. Jamoa u yerda iliq va qulay ob-havo sharoitida mashg‘ulotlar o‘tkazishi ko‘zda tutilgan.
"Arsenal" tarkibidagi ko‘pchilik yulduzlar Qatarga bormayapti. Ular ichida terma jamoalari saralashdan o‘ta olmagan Muhammad Elneni, Kiran Tirni, Oleksandr Zinchenko va Martin Edegorlar bor. Shuningdek, o‘z terma jamoalariga jalb etilmagan Emil Smit-Rou, Fabiu Viyeyra hamda Gabriellar ham o‘sha yerda bo‘lishadi.
Mikel Arteta bo‘lajak sayohat haqida gapirar ekan, jumladan shunday deydi: "...biz iliqroq iqlim sharoitida yana maydonda birga bo‘lishni intizorlik bilan kutamiz. Muhitning o‘zgarishi jamoaga ijobiy ta’sir ko‘rsatadi deb o‘ylayman. Mavsumning ikkinchi qismiga tayyorgarlikni boshlashimiz lozim. Dubay shahri esa bizning bu maqsadimizni ro‘yobga chiqarish uchun o‘ta qulay joy. U yerda tashkil etiladigan Dubay Superkubogi musobaqasi, bizga dunyoning ikki kuchli jamoasi bo‘lgan "Milan" va "Lion"ga qarshi o‘zimizni sinab ko‘rish imkonini beradi".
"Arsenal" dekabr avvalida ikki o‘yin o‘tkazadi. Shundan so‘ng, jamoa ortga, Londonga qaytadi va APLga tayyorgarlik ko‘ra boshlaydi. "To‘pchilar" boksing deyning ilk turida "Vest Xem"ga qarshi, o‘z uyida to‘qnash keladi. Ayni damda esa APLda, 14 turdan keyin 37 ochko to‘plagan holda, Arteta jamoasi yaqqol yetakchilik qilmoqda.
ISMATOV J.
