Лондоннинг "Арсенал" клуби қишки таътил давомида Бирлашган Араб Амирликларининг Дубай шаҳрида ўртоқлик ўйинлари ўтказади. Бу ҳақида аввал ҳам хабар берган эдик. Икки баҳсдан иборат турнир Дубай Суперкубоги деб номланади ва "Лион" ва "Милан" лондонликларга рақиб бўлади.
"Тўпчилар" бу турнирдаги илк баҳсда, 8 декабрь куни, Франциянинг "Лион" клубига қарши чиқади. 13 декабрда эса Италиянинг амалдаги чемпиони "Милан", АПЛ етакчиси билан куч синашиб кўради. Ушбу кичик мусобақада "Ливерпуль" ҳам қатнашиши кўзда тутилган. Бироқ, мерсисайдликлар ўзининг АПЛдаги рақиби бўлган Микель Артета жамоаси билан ӯйнамайди.
Ушбу турнирдан кўзланган асосий мақсад 6 ҳафталик танаффус вақтида Жаҳон чемпионатига танлаб олинмаган футболчиларнинг спорт формасини сақлаб туришдан иборат. Шу туфайли "Арсенал" тез орада Дубайга парвоз қилади. Жамоа у ерда илиқ ва қулай об-ҳаво шароитида машғулотлар ўтказиши кўзда тутилган.
"Арсенал" таркибидаги кўпчилик юлдузлар Қатарга бормаяпти. Улар ичида терма жамоалари саралашдан ўта олмаган Муҳаммад Эльнени, Киран Тирни, Олександр Зинченко ва Мартин Эдегорлар бор. Шунингдек, ўз терма жамоаларига жалб этилмаган Эмиль Смит-Роу, Фабиу Виейра ҳамда Габриэллар ҳам ўша ерда бўлишади.
Микель Артета бўлажак саёҳат ҳақида гапирар экан, жумладан шундай дейди: "...биз илиқроқ иқлим шароитида яна майдонда бирга бўлишни интизорлик билан кутамиз. Муҳитнинг ўзгариши жамоага ижобий таъсир кўрсатади деб ўйлайман. Мавсумнинг иккинчи қисмига тайёргарликни бошлашимиз лозим. Дубай шаҳри эса бизнинг бу мақсадимизни рўёбга чиқариш учун ўта қулай жой. У ерда ташкил этиладиган Дубай Суперкубоги мусобақаси, бизга дунёнинг икки кучли жамоаси бўлган "Милан" ва "Лион"га қарши ўзимизни синаб кўриш имконини беради".
"Арсенал" декабрь аввалида икки ўйин ўтказади. Шундан сўнг, жамоа ортга, Лондонга қайтади ва АПЛга тайёргарлик кўра бошлайди. "Тўпчилар" боксинг дейнинг илк турида "Вест Хэм"га қарши, ўз уйида тўқнаш келади. Айни дамда эса АПЛда, 14 турдан кейин 37 очко тўплаган ҳолда, Артета жамоаси яққол етакчилик қилмоқда.
ИСМАТОВ Ж.
