"Manchester Yunayted" hujumchisi Markus Reshford ingliz klubi bilan bir nechta turnirda chempionlikni qo‘lga kiritishni istayotganini aytdi.

“Men eng muhim turnirlarda g‘alaba qozonishni istayman. Menga o‘z klubim uchun bir necha finalda qatnashish va sovrinlarni qo‘lga kiritish baxtiga muyassar bo‘ldim, lekin baribir yana eng katta sovrinlarni qo‘lga kiritishni istayman – men Premyer-liga va Chempionlar ligasida g‘alaba qozonishni xohlayman. Men shuni his qilyapmanki, agar qo‘ldan kelgancha yaxshi o‘yin ko‘rsatsak, boshqa jamoalar haqida o‘ylamasligimiz kerak. Agar biz faqat o‘zimizga e’tibor qaratsak va har bir o‘yinda bor kuchimizni sarflasak, mag‘lubiyat yoki durangdan ko‘ra ko‘proq g‘alaba qozonamiz”.

Reshford “Manchester Yunayted” tarbiyalanuvchisi hisoblanadi. 25 yoshli ingliz futbolchisi joriy mavsumda “qizil iblislar” safida barcha turnirlar doirasida 19 ta o‘yinda maydonga tushib, 8 ta gol urdi va 3 ta golli uzatmani amalga oshirdi.