Shu kunlarda sardorimiz, «Roma» klubi hujumchisi Eldor Shomurodov qishki transfer oynasida Rim klubini tark etishi mumkinligi haqida xabarlar yana "oralab" qoldi.

Italiyalik mashhur  insayder Nikola Skiraning yozishicha, o‘zbekistonlik hujumchi «Roma» bosh murabbiyi Joze Mourinyoning rejalaridan o‘rin olmagan.  Shu bois u qishki transfer oynasida «bo‘rilar» safini tark etishi kutilmoqda.

Qayd etilishicha, Shomurodovga A Seriyaning uch klubi qiziqish bildirmoqda. Jumladan, «Sampdoriya», «Monsa» va «Torino» yanvar oyida ochiladigan transfer oynasida Eldorni o‘z safiga taklif etish imkoniyatlarini ko‘rib chiqmoqda.  

Ma’lumot uchun, bosh jamoamizning 27 yoshli forvardi joriy mavsum A Seriyada 6 o‘yinda maydonga tushdi. Yevropa ligasida esa 2 uchrashuvda bitta golga mualliflik qildi.

Eslatib o‘tamiz, yozgi transfer oynasida «Torino» va yana bir qator klublar Shomurodovga qiziqish bildirgan, ammo Rim klubi o‘z hujumchisini ijaraga berishni istamay, 10 million yevrodan kamiga sotmoqchi emasligi haqida xabar qilingandi.