Qatardagi Jahon chempionatining guruh bahclari o‘z yakuniga yetishga yaqin turibdi. Bugundan guruh bahslarining 3 turi start oladi. Mezbonlarning o‘zi turnirni guruh bosqichida tark etgan tarixdagi ilk terma jamoaga aylandi. Ammo qatarlik futbolchilarning "eshikni qattiq yopib" chiqib ketish imkoniyati mavjud. Ular 3 turni A guruhining eng kuchli jamoasi bo‘lgan Niderlandiyaga qarshi o‘tkazadi. Shovqinli, ehtiroslarga boy bo‘lgan bir guruh muxlislar yana o‘sha, oldiga "Qatar" deb yozilgan jigarrang liboslar bilan stadionning bir sektorini to‘ldirib o‘tiradi.

"New York Times" nashrining iddao qilishicha, ushbu muxlislar o‘zga mamlakatlardan, ma’lum miqdordagi haq evaziga olib kelinib, o‘sha atmosferani yaratish uchun vazifalantirilgan. Ularning soni taxminan 1500 atrofida. Yo‘llangan muxlislar Livan, Suriya, Misr va Jazoir davlatlaridan taklif etilgan bo‘lib, ular uchun Qatarda tekin joy, oziq-ovqat va o‘yin chiptalari kafolatlangan. Shuningdek, ularga ko‘rsatgan "xizmatlari" uchun maosh ham beriladi. Nashrning qayd etishicha, ushbu muxlislar oktyabr oyining o‘rtalarida Qatarga kelgan. Ular bir oy mobaynida kuy-qo‘shiqni qanday kuylash va mamlakat milliy madhiyasini aytishni mashq (repitisiya) qilishgan. O‘sha muxlislardan biri, asli livanlik bo‘lgan (ismi yashirilgan) fan klub a’zosining so‘zlariga ko‘ra, pul bu yerda asosiy rol o‘ynamaydi.

U shunday deydi: "Bilasizmi, biz arab mamlakatlaridan birini qo‘llab-quvvatlashni burchimiz deb bilamiz. Bizning tilimiz, dinimiz va madaniyatimiz bir. Bu yerda esa ana shu narsalarni ulashmoqdamiz. Dunyoga o‘zgacha kayfiyat namoyish etishni niyat qilganmiz. Jamoamiz yutishi yoki mag‘lub bo‘lishidan qat’iy nazar, biz o‘z suyuklilarimizni oxirigacha qo‘llaymiz".

Qatar Jahon chempionatiga mezbonlik qilish huquqini yutib olganidan beri 14 yil o‘tdi. Bu vaqt davomida ko‘pchilik tomonidan Qatar tomon tanqid toshlari otilgandi. Shunday masalalardan biri qatarliklarning futbolga muxlislik qilish madaniyatining yo‘qligi edi. Yo‘llangan muxlislar voqeasi esa ushbu tanqidlarning asosli ekanini anglatadi.

ISMATOV J.