Қатардаги Жаҳон чемпионатининг гуруҳ баҳcлари ўз якунига етишга яқин турибди. Бугундан гуруҳ баҳсларининг 3 тури старт олади. Мезбонларнинг ўзи турнирни гуруҳ босқичида тарк этган тарихдаги илк терма жамоага айланди. Аммо қатарлик футболчиларнинг "эшикни қаттиқ ёпиб" чиқиб кетиш имконияти мавжуд. Улар 3 турни А гуруҳининг энг кучли жамоаси бўлган Нидерландияга қарши ўтказади. Шовқинли, эҳтиросларга бой бўлган бир гуруҳ мухлислар яна ўша, олдига "Қатар" деб ёзилган жигарранг либослар билан стадионнинг бир секторини тўлдириб ўтиради.

"New York Times" нашрининг иддао қилишича, ушбу мухлислар ўзга мамлакатлардан, маълум миқдордаги ҳақ эвазига олиб келиниб, ўша атмосферани яратиш учун вазифалантирилган. Уларнинг сони тахминан 1500 атрофида. Йўлланган мухлислар Ливан, Сурия, Миср ва Жазоир давлатларидан таклиф этилган бўлиб, улар учун Қатарда текин жой, озиқ-овқат ва ўйин чипталари кафолатланган. Шунингдек, уларга кўрсатган "хизматлари" учун маош ҳам берилади. Нашрнинг қайд этишича, ушбу мухлислар октябрь ойининг ўрталарида Қатарга келган. Улар бир ой мобайнида куй-қўшиқни қандай куйлаш ва мамлакат миллий мадҳиясини айтишни машқ (репитиция) қилишган. Ўша мухлислардан бири, асли ливанлик бўлган (исми яширилган) фан клуб аъзосининг сўзларига кўра, пул бу ерда асосий рол ўйнамайди.

У шундай дейди: "Биласизми, биз араб мамлакатларидан бирини қўллаб-қувватлашни бурчимиз деб биламиз. Бизнинг тилимиз, динимиз ва маданиятимиз бир. Бу ерда эса ана шу нарсаларни улашмоқдамиз. Дунёга ўзгача кайфият намойиш этишни ният қилганмиз. Жамоамиз ютиши ёки мағлуб бўлишидан қатъий назар, биз ўз суюклиларимизни охиригача қўллаймиз".

Қатар Жаҳон чемпионатига мезбонлик қилиш ҳуқуқини ютиб олганидан бери 14 йил ўтди. Бу вақт давомида кўпчилик томонидан Қатар томон танқид тошлари отилганди. Шундай масалалардан бири қатарликларнинг футболга мухлислик қилиш маданиятининг йўқлиги эди. Йўлланган мухлислар воқеаси эса ушбу танқидларнинг асосли эканини англатади.

ИСМАТОВ Ж.