Argentinaga qarshi jahon chempionati guruh bosqichi 3-tur uchrashuvi arafasida Polsha terma jamoasi bosh murabbiyi Cheslav Mixnevich raqib jamoa yetakchisi Lionel Messi haqida o‘z fikrlari bilan o‘rtoqlashdi.
Mutaxassis Messini qanday to‘xtatish kerakligi haqidagi savolga aniq javobi yo‘qligini tan oldi.
“Men bir vaqtlar 18 yoshli Messini qanday to‘xtatish haqida o‘ylagan edim. Bu vaqt ichida u 800 dan ortiq gol urdi va 300 dan ortiq golli uzatmani amalga oshirdi. Demak, hech kim bu savolga aniq javobni bilmaydi", - deya Mixnevichning so‘zlarini keltiradi Match TV.
Shuningdek, murabbiyning so‘zlariga ko‘ra, Argentina terma jamoasidagilarning barchasi Messi uchun joriy Jahon chempionatining ahamiyatini bilishadi, shuning uchun ular ushbu turnirda imkon qadar uzoqqa borish uchun hamma narsani qiladilar.
Eslatib o‘tamiz, Polsha - Argentina uchrashuvi ertaga, 30 noyabr kuni bo‘lib o‘tadi. Uchrashuv soat 00:00da boshlanadi. Ayni damda yevropaliklar C guruhidagi turnir jadvalida janubiy amerikaliklardan bir ochkoga oldinda.
