Saudiya Arabistoni terma jamoasi futbolchilariga Argentina ustidan qozonilgan g‘alabadan keyin "Rolls-Roys" avtomobillari topshirilmadi.
Saudiya Arabistoni JCH-2022 guruh bosqichining birinchi turida Argentinani 2:1 hisobida mag‘lub etgandi.
Tez orada saudiyalik futbolchilarga premium "Rolls-Royc Fantom" avtomobili sovg‘a qilinishi haqida ma’lumot paydo bo‘ldi. Bu qaror Saudiya Arabistoni valiahd shahzodasi Muhammad bin Salmon tomonidan qabul qilingani xabar qilingandi.
Bu ma’lumotni Saudiya Arabistoni futbol federasiyasi prezidenti Yosir Al-Mishal inkor qildi.
"Yo‘q, yo‘q. Futbolchilarimiz yurt nomidan g‘urur bilan o‘ynashdi. Tarixiy o‘yinda terma jamoa sharafini himoya qilish ular uchun sharaf va baxt edi. Bu mish-mishlar haqiqatga to‘g‘ri kelmaydi. Albatta, ularda bonus bor edi, lekin bu oddiy bonus edi. Bunday holatlar uchun bizda qoidalar mavjud.
Ular bonuslar uchun emas, mamlakat sharafi uchun o‘ynashadi. Tarix yaratish uchun o‘ynashadi. Ularning ko‘pchiligi Argentina ustidan qozonilgan g‘alabadan so‘ng mashhur bo‘lishdi", — dedi Al-Mishal Marca nashriga bergan intervyusida.
