"Milan" va Portugaliya terma jamoasi hujumchisi Rafael Leau o‘zi o‘ynagan eng yaxshi himoyachilarni nomladi.

“Umuman olganda, har bir himoyachiga qarshi o‘ynash oson emas. Ularning har biri o‘z sohasining professionali bo‘lib, kundan kun o‘sib bormoqda. Ammo, agar kimdir ajralib tursa - Pepe va Tiago Silva. Ajoyib futbolchilar", — deya Leau so‘zlarini keltiradi pianetamilan.it.

23 yoshli portugaliyalik futbolchi 2019 yilning avgustidan buyon “Milan” safida to‘p suradi va joriy mavsumda jamoa safida barcha musobaqalarda 31 ta o‘yinda maydonga tushib, 9 ta gol urdi va 10 ta golli uzatmani amalga oshirdi.

Avvalroq Leau Italiya klubi bilan yangi shartnoma imzolashga tayyorligini tasdiqlagani haqida xabar berilgandi.