Braziliyaning Terra nashri xabariga ko‘ra, Neymar Lionel Messining jahon chempionatidagi g‘alabasidan shunchalik ilhomlanganki, u terma jamoadagi faoliyatini yakunlash g‘oyasidan voz kechgan, chunki u keyingi turnirda "Selesao"ni chempionlikka olib chiqishni xohlaydi.
Neymar birinchi o‘yinda jarohat oldi va faqat pley-offdagina maydonsha qaytdi, ammo bu jamoaga yordam bermadi - braziliyaliklar ¼ finalda Xorvatiyaga penaltilar seriyasida mag‘lub bo‘lishdi.
"PSJ" hujumchisi avvalroq bu uning so‘nggi jahon chempionati bo‘lishi mumkinligini aytgandi, biroq u faoliyatini yakunlashini e’lon qilmagan, chunki bu boradagi fikri 35 yoshida buni uddalay olgan Messining g‘alabasidan keyin o‘zgargan.
Do‘sti orzu qilingan kubokni ko‘targanini ko‘rgach, Neymar 2026 yilda terma jamoani shon-sharafga olib borish niyatida Braziliyada o‘ynashni davom ettirishga qaror qildi. Keyingi jahon chempionatida u 34 yoshda bo‘ladi. Agar u jismoniy holatini saqlab qolsa va yuqori saviyada o‘ynashda davom etsa, Neymar o‘sha vaqtda Braziliya terma jamoasida katta rol o‘ynashi mumkin.
2010 yilgi debyutidan beri Neymar terma jamoa safida 124ta o‘yinda maydonga tushib, 77ta gol urdi va Pele bilan to‘purarlar ro‘yxatida birinchi o‘rinni bo‘lishib turibdi. Biroq, har qancha urinmasin, braziliyalik hujumchi haligacha xalqaro maydonda yirik sovrinni qo‘lga kirita olmadi. 2019 yilgi Amerika kubogidagi Braziliyaning g‘alabasida Neymar jarohat sabab turnirni o‘tkazib yuborgan.
