Бразилиянинг Terra нашри хабарига кўра, Неймар Лионель Мессининг жаҳон чемпионатидаги ғалабасидан шунчалик илҳомланганки, у терма жамоадаги фаолиятини якунлаш ғоясидан воз кечган, чунки у кейинги турнирда "Селесао"ни чемпионликка олиб чиқишни хоҳлайди.
Неймар биринчи ўйинда жароҳат олди ва фақат плей-оффдагина майдонша қайтди, аммо бу жамоага ёрдам бермади - бразилияликлар ¼ финалда Хорватияга пенальтилар сериясида мағлуб бўлишди.
"ПСЖ" ҳужумчиси аввалроқ бу унинг сўнгги жаҳон чемпионати бўлиши мумкинлигини айтганди, бироқ у фаолиятини якунлашини эълон қилмаган, чунки бу борадаги фикри 35 ёшида буни уддалай олган Мессининг ғалабасидан кейин ўзгарган.
Дўсти орзу қилинган кубокни кўтарганини кўргач, Неймар 2026 йилда терма жамоани шон-шарафга олиб бориш ниятида Бразилияда ўйнашни давом эттиришга қарор қилди. Кейинги жаҳон чемпионатида у 34 ёшда бўлади. Агар у жисмоний ҳолатини сақлаб қолса ва юқори савияда ўйнашда давом этса, Неймар ўша вақтда Бразилия терма жамоасида катта рол ўйнаши мумкин.
2010 йилги дебютидан бери Неймар терма жамоа сафида 124та ўйинда майдонга тушиб, 77та гол урди ва Пеле билан тўпурарлар рўйхатида биринчи ўринни бўлишиб турибди. Бироқ, ҳар қанча уринмасин, бразилиялик ҳужумчи ҳалигача халқаро майдонда йирик совринни қўлга кирита олмади. 2019 йилги Америка кубогидаги Бразилиянинг ғалабасида Неймар жароҳат сабаб турнирни ўтказиб юборган.
