“Napoli” hujumchisi Viktor Osimxen yaqin orada jamoani tark etish niyatida emasligini aytdi.
Noyabr oyi oxirida 23 yoshli nigeriyalik "Manchester Yunayted"ning asosiy transfer maqsadlaridan biri ekanligi ma’lum qilingandi.
"Men Yevropaning eng yaxshi klublaridan birida o‘ynayapman va u bilan g‘alaba qozonishni xohlayman. Men Italiyada muhim sovrinni qo‘lga kiritmoqchiman. “Napoli”dan yaxshiroq jamoa borligini tasavvur qilish qiyin. Men bor e’tiborimni faqat ushbu mavsumga qaratganman, chunki biz hali hech narsaga erishmadik. Biz qandaydir chempionlikni qo‘lga kiritishimiz kerak, keyin ko‘ramiz", - deya Osimxenning so‘zlarini keltiradi Il Mattino.
Osimxen “Napoli”da 2020-yil sentyabridan buyon to‘p suradi. 2022/23 yilgi mavsumda u neapolliklar safida 14 uchrashuvda 10 ta gol urdi va 3 ta golli uzatmani amalga oshirdi.
Transfermarkt.com portali hujumchining narxini 70 million yevroga baholamoqda.