“Наполи” ҳужумчиси Виктор Осимхен яқин орада жамоани тарк этиш ниятида эмаслигини айтди.
Ноябрь ойи охирида 23 ёшли нигериялик "Манчестер Юнайтед"нинг асосий трансфер мақсадларидан бири эканлиги маълум қилинганди.
"Мен Европанинг энг яхши клубларидан бирида ўйнаяпман ва у билан ғалаба қозонишни хоҳлайман. Мен Италияда муҳим совринни қўлга киритмоқчиман. “Наполи”дан яхшироқ жамоа борлигини тасаввур қилиш қийин. Мен бор эътиборимни фақат ушбу мавсумга қаратганман, чунки биз ҳали ҳеч нарсага эришмадик. Биз қандайдир чемпионликни қўлга киритишимиз керак, кейин кўрамиз", - дея Осимхеннинг сўзларини келтиради Il Mattino.
Осимхен “Наполи”да 2020-йил сентябридан буён тўп суради. 2022/23 йилги мавсумда у неаполликлар сафида 14 учрашувда 10 та гол урди ва 3 та голли узатмани амалга оширди.
Transfermarkt.com портали ҳужумчининг нархини 70 миллион еврога баҳоламоқда.