Qozog‘istonning Olma-ota shahrida shaxmatning rapid yo‘nalishida jahon chempionati bugun yakuniga yetdi. Bugun shaxmatchilar so‘nggi 4 ta tur bahslarini to‘kazishdi.

Kechagi o‘yinlardan so‘ng 3-o‘rinda borayotgan Nodirbek Abdusattorov uchun bugungi bahslar u qadar muvaffaqiyatli bo‘lmadi. Hamyurtimiz to‘rtta o‘yinning 3 tasida durang o‘ynab, bir marta yutqazib qo‘ydi.

Hindistonlik Vidit Santoshga qarshi o‘yindagi mag‘lubiyat alamli bo‘ldi. Nodirbek oddiy vaziyatda judayam qo‘pol xatoga yo‘l qo‘ydi va kamida durangni qo‘ldan chiqardi. Aks holda o‘sha o‘yin durang bilan yakunlaganida ham Abdusattorov turnirni kuchli beshlikda yakunlashi mumkin edi.

Rapid bo‘yicha amaldagi jahon chempioni hisoblangan vatandoshimiz 8,5 ochko bilan musobaqani 10-pog‘onada yakunladi.

Magnus Karlsen esa chempionlikni qo‘lga kiritdi. Norvegiyalik sportchi 10 ochko jamg‘ardi. Ikkinchi pog‘onani kutilmaganda Vinsent Keymer egalladi (9,5 ochko). Germaniyalik shaxmatchi turnirda 54-sportchi sifatida saralagandi. Uchinchi o‘rinni egallagan Fabiano Karuano (AQSH) ham 9,5 ochko jamg‘ardi. U qo‘shimcha ko‘rsatkichlar bo‘yicha Keymardan ortda qoldi.

Vakillarimiz orasida Shamsiddin Vohidov (39)? Javohir Sindarov (69), Muhiddin Madaminov (85), Nodirbek Yoqubboyev (88) va Muhammadzohid Suyarov (98) kuchli yuzlikka kirishdi.

Ertadan blis bo‘yicha JCH bahslari boshlanadi. Unda sportchilar jami 21 martadan o‘yin o‘tkazishadi.