"Benfika" yarim himoyachisi Enso Fernandes JCH-2022 kashfiyotlaridan biri bo‘ldi. Argentinalik futbolchi Qatardagi turnirning eng yaxshi yosh futbolchisi deb tan olindi va endi transfer bozorida uning uchun jiddiy kurash avj oldi.
Enso Fernandesga qiziqish bildirayotgan klublardan biri bu "Chelsi". Londonliklar argentinalik uchun 120 million yevro to‘lashlari kerak - bu 21 yoshli yarim himoyachining shartnomasida ko‘rsatilgan to‘lov miqdori.
Goal xabariga ko‘ra, Fernandes transferini moliyalashtirish doirasida "Chelsi" yanvar oyida Jorjinyoni sotishga tayyor. Shu bilan birga, londonliklar italiyalikni sotishdan ko‘p daromad olishmaydi, chunki uning shartnomasi yozda tugaydi.