Qozog‘istonning Olma-ota shahrida shaxmatning blis yo‘nalishida jahon chempionati bahslari boshlandi. Bugun erkaklar 12ta tur bahslarini o‘tkazishdi.

Kecha yakunlangan rapid yo‘nalishida 10-o‘rinni egallagan Nodirbek Abdusattorov blisni ham yaxshi boshlab, ketma-ket 3 ta o‘yinda g‘alaba qozondi. Ammo keyinchalik u o‘yinlarni yutqaza boshladi. Natijada u 12ta o‘yinda 7 ochko to‘plagan holda 46-o‘rinni egallab turibdi.

O‘zbekistonliklar orasida kutilmaganda Muhiddin Madaminov yaxshi ishtirok etmoqda. U 8 ochko bilan 18-o‘rinni egallab turibdi. 16 yoshli shaxmatchimiz musobaqada 150-pog‘onada saralangandi.

Jahongir Vohidov esa 7,5 ochko bilan 28-pog‘onani band etib turgan bo‘lsa, qolgan sportchilarimiz hozircha top-100dan pastda joylashishgan.

Erkaklar musobaqasiada Xikaru Nakamura (AQSH) 10 ochko bilan peshqadam bo‘lib turibdi. Anish Giri, Magnus Karlsen, Daniil Dubov, Xalik Martirosyan va Richard Rapport hisobida 9 ochko mavjud.

Ayollar esa bugun 9ta o‘yinda ishtirok etishdi. Umida Omonova 5,5 ochko bilan 25-pog‘onani band etib turibdi. Afruza Hamdamova hisobida 4,5, Nafisa Mo‘minovada esa 4 ochko bor.