"Tottenxem" bosh murabbiyi Antonio Konte boshqaruv kengashi raisi Daniel Levidan "Bayer" himoyachisi Pyer Xinkapye bilan shartnoma imzolashni so‘radi.
Tuttomercatoweb ma’lumotlariga ko‘ra, ekvadorlik futbolchi joriy mavsumda Bundesliga va JCH-2022 o‘yinlari bilan Konteni hayratda qoldi. Shuningdek u "Chelsi" kabi Yevropaning ko‘plab top klublarida qiziqish uyg‘otdi.
Manbaga ko‘ra, "Tottenxem" 20 yoshli futbolchi uchun kurashda peshqadamlik qilmoqda va uni yanvarda yoki yozda sotib olmoqchi.
Avvalroq, "Chelsi" Xinkapye uchun 30 million yevro taklif qilgani xabar qilingandi.
Futbolchi 2021 yilning avgustida "Bayer"ga o‘tgan va 2026 yilning yoziga qadar shartnoma imzolagan. Himoyachi joriy mavsumda 21 ta o‘yinda maydonga tushdi, shu jumladan Ekvador terma jamoasi safida 2022 yilgi jahon chempionatida 3 ta o‘yin o‘tkazdi.