"Manchester Yunayted" bosh murabbiyi Erik ten Xag "Kristal Pelas" darvozaboni Jek Batlend jamoaga kelishini tasdiqladi.

Oldinroq "qizil iblislar" 29 yoshli angliyalikni zaxira darvozaboni sifatida qo‘shib olmoqchi ekani xabar qilingandi.

"Nyukasl" "Manchester Yunayted"ga ijaraga berilgan Martin Dubravkani qaytarib oldi. U ten Xag jamoasida ikki o‘yinda ishtirok etdi.

"Dubravka "Nyukasl"ga qaytib ketdi, endi bizga tajribali darvozabon kerak. Bizda yosh futbolchilar bor va ular yaxshi harakat qilishyapti, lekin bizda shunchalik ko‘p o‘yinlar borki, mashg‘ulotlarda bizga uchta yaxshi darvozabon kerak. Batlend jamoamizga nima olib kelishi mumkin? Men De Xeadan juda xursandman, bu aniq, u bizning 1-raqamimiz, u juda yaxshi o‘yinchi. Ammo shuni ta’kidlamoqchimanki, u bilan har doim nimadir sodir bo‘lishi mumkin va siz bunga tayyor bo‘lishingiz kerak", - dedi ten Xag.

29 yoshli Batlend “Kristal Pelas”da 2020 yil oktyabr oyidan beri to‘p suradi. Joriy mavsumda darvozabon rasmiy uchrashuvlarda qatnashmadi.