O‘zbekiston futbol hakamlari markazida 2023 yilgi mavsum uchun nazoratchilar va hakamlar uchun qishki o‘quv-yig‘inlar boshlandi. Unga ko‘ra, quyida keltirilgan sanalarda nazoratchilar, hakamlar va yordamchi hakamlar uchun o‘quv-mashg‘ulot yig‘inlari o‘tkaziladi:

9–10-yanvar kunlari — nazoratchilar;

16–21-yanvar hamda 30-yanvar – 4-fevral kunlari — Ayollar futboli, Birinchi liga va hakamlik sohasida o‘zini sinamoqchi bo‘lgan nomzodlar;

6–11-fevral kunlari — Superliga hakamlari va yordamchi hakamlari;

13–18-fevral kunlari — Pro liga hakamlari va yordamchi hakamlari.

Bundan tashqari, 13–18-fevral kunlari VAR lisenziyasi uchun seminar bo‘lib o‘tishi rejalashtirilgan. Unda hakamlar uchun avvalgi seminarning mantiqiy davom sifatida VAR-simulyatorida o‘quv mashg‘ulotlari o‘tkaziladi. Ushbu bosqichda hakamlar avvaldan tayyorlangan videroliklarda mashg‘ulot olib borishadi.

Bugun nazoratchilar uchun o‘quv mashg‘ulot yig‘inlari boshlandi. Yig‘in doirasida O‘zbekiston futbol assosiasiyasi birinchi vise-prezidenti Ravshan Ermatov mashg‘ulotlarda zamonaviy hakamlik tajribasi, ayniqsa yaqinda Qatarda o‘tkazilgan mundialdagi hakamlik ishlaridagi yangiliklarga urg‘u berilishiga e’tibor qaratdi. Bunga qo‘shimcha ravishda, mashg‘ulotlar davomida uchrashuv qaydnomasini to‘ldirish, o‘yin qoidalaridagi o‘zgarishlar va videoroliklar orqali o‘yinda yuz berishi mumkin bo‘lgan holatlar yuzasidan zaruriy tavsiyalar berib borilmoqda. Mashg‘ulotlar ertaga davom ettiriladi.