Mana, 2023 yil boshlandi va yevrofutbolda «qaynoq» o‘yinlar to‘xtagani yo‘q. Lekin quyida biz bilan xayrlashgan 2022 yil haqida gaplashamiz. Xo‘sh, tarixga aylangan yilda yevrofutbolni asosan kimlar yorqinlashtirishdi?
ESKI RAQOBAT
Golga assistentlik qilish bobida hamon uzatmalarning ikki buyuk ijrochisi oldinda - Lionel Messi va Kevin de Bryuyne. Bunda «PSJ»ning argentinalik yulduzi yil yakuni bo‘yicha «Manchester Siti»ning belgiyalik yetakchisini 2ta assist darajasida ortda qoldirdi. Alohida e’tiborga oling, samarali uzatmalar soniga futbolchilarning milliy jamoalaridagi natijalari ham kiritilgan.
YANGI RAQOBAT
2022 yil to‘purarlari reytingida Kilian Mbappe va Erling Xoland raqobati yuzaga keldi. To‘g‘ri, PSJ» vakili yakunda norvegiyalikni 10ta golga ortda qoldirdi. Ammo Xoland bunga ko‘nmasligi tayin. Har holda, u «Manchester Siti» safiga qo‘shilganidan buyon gol urishdan to‘xtayotganini yo‘q. Golleadorlarning top-ro‘yxatida Robert Levandovski, Lionel Messi va Karim Benzkema kabi faxriylarga ham joy topilgani e’tiborga molik holat, albatta.
YOSHLAR TO‘LQINI
21 yoshgacha bo‘lgan futbolchilarga qarasak, «Arsenal»ning umidbaxsh o‘yinlarida o‘zini ko‘rsatayotgan Bukayo Saka yil davomida 11ta goli yoniga 9ta samarali uzatma qo‘shib qo‘ydi. «Gol+pas» tizimi bo‘yicha Jamol Musaila («Bavariya») angliyalikning asosiy ta’qibchisiga aylandi - 18 ochko
PENALTISEVAR KARIM!
«Real»da bosh goleadorlik rolini bo‘shatishni xayoliga ham keltirmayotgan Karim Benzema yil davomida La Liga o‘yinlarida penaltidan 9ta gol urdi - bu Yevropaning kuchli 5ta chempionatida eng yuqori natijadir. Aslida fransiyalikning bu boradagi statistikasi yanada yaxshiroq bo‘lishi mumkin edi. Deylik, Karim 1ta o‘yinda 2ta penaltini ko‘kka sovurgan paytlar ham kuzatildi.
«OFSAYD» CHIZIG‘IDA...
«PSJ» hujumchisi Kilian Mbappe 2022 yil davomida Liga 1 o‘yinlarining o‘zida 38 marta «ofsayd» holatiga tushdi. Bu uning o‘yindan tashqari vaziyat chizig‘i ustida harakatlanishidan dalolat. Shuningdek, «Atletik» hujumchisi Inyaki Uilyams va «Kdineze» vakili Jerar Delofeu ham «ofsayd»dan qochishga ko‘p urinadi.
APL-2022/2023da asosiy 4ta ko‘rsatkich bo‘yicha «Manchester Siti» oldinda. Biroq turnir jadvalining yuqori nuqtasi «Arsenal»ga tegishli. Ha, APLda gohida eng yaxshi to‘purar va assistentga ega bo‘lib, eng ko‘p gol urgan va uzatmalar masalasida dars bergan holda ham, turnir jadvali 1-pog‘onasiga chiqolmaslik mumkin.
