"Andijon"ning tarkibidan keyin "Andijon U-19" ham yangi mavsum uchun tayyorgarlikka kirishdi. Klub rahbariyati mahalliy murabbiy Islom Ahmedovga "Andijon U-19" jamoasini ishonib topshirdi

"Avvalo shuni ma’lum qilmoqchimizki, bu yil ushbu jamoamizga Islom Ahmedov bosh murabbiylik qiladi. Klub rahbariyati tomonidan bu masalada aynan ushbu iqtidorli murabbiyga ishonch bildirildi.

36 yoshli Islom Ahmedov futbolchi sifatida “Andijon” klubida ham to‘p surganini muxlislar yaxshi eslaydilar. Faoliyatini tugatgach, o‘zini murabbiylikka va ayniqsa, bolalar futboliga bag‘ishladi.

Andijon viloyat bolalar va o‘smirlar futbol akademiyasida ishlash orqali ancha ko‘zga tashlanib qoldi. O‘zbekiston birinchiliklarida o‘tkazilayotgan musobaqalarda Islom Ahmedov boshchiligidagi jamoalar hamisha sovrindorlar qatoridan joy olib kelmoqda. U tarbiyalayotgan futbolchilarning bir nechtasi ayni paytda O‘zbekiston o‘smirlar terma jamoasiga nomzod sanaladi. Endilikda Ahmedov “Andijon” U-19 jamoasini boshqaradi.

Bilasiz, o‘tgan yili O‘zbekiston U-19 birinchiligida jamoamiz yoshlari faxrli 3-o‘rinni egallashdi. Endilikda o‘sha jamoa ustozi sifatida ishlagan Lutfullo Majidov U-21 jamoamizga bosh murabbiylik qilishi haqida oldin xabar berib o‘tganmiz.

Islom Ahmedov boshchiligidagi U-19 o‘quv-mashg‘ulot yig‘inlarini boshladi. Iste’dodli yigitlar saralanib olinadi va bir qator nazorat uchrashuvlari ham o‘tkaziladi" - deyiladi "Andijon" futbol klubining matbuot xizmatida.