O‘zbekiston futbol hakamlari markazida 2023 yilgi mavsum uchun nazoratchilar va hakamlar uchun qishki o‘quv-yig‘inlar boshlandi.

9–10 yanvar kunlari nazoratchilar uchun o‘quv mashg‘ulot yig‘inlari bo‘lib o‘tdi. Yig‘in doirasida O‘zbekiston futbol assosiasiyasi birinchi vise-prezidenti Ravshan Ermatov mashg‘ulotlarda zamonaviy hakamlik tajribasi, ayniqsa yaqinda Qatarda o‘tkazilgan mundialdagi hakamlik ishlaridagi yangiliklarga urg‘u berilishiga e’tibor qaratdi. Bunga qo‘shimcha ravishda, mashg‘ulotlar davomida uchrashuv qaydnomasini to‘ldirish, o‘yin qoidalaridagi o‘zgarishlar va videoroliklar orqali o‘yinda yuz berishi mumkin bo‘lgan holatlar yuzasidan zaruriy tavsiyalar berib borildi.

Nazoratchilar uchun o‘tkazilayotgan o‘quv-mashg‘ulot yig‘inining ikkinchi kunida nazoratchilar dastlab qaydnoma, reglament va o‘yin qoidalariga oid test topshirgan bo‘lishsa, kun davomida o‘yindagi holatlarni tahlil qilishdi (jarima maydonchasi ichida va yakkakurashlardagi qoidabuzarliklar, o‘yindan tashqari holat va h.k.) hamda guruhlarga bo‘lingan holda taqdim etilgan videomateriallarni muhokama qilishdi.