Rossiyalik mutaxassis Igor Cherevchenko Tojikistonning “Istiqlol” klubi bosh murabbiyiga aylanadi. Bu haqda jurnalist Ivan Karpov o‘zining Telegram-kanalida xabar berdi.
Qayd etilishicha, ertaga, 16 yanvar kuni mutaxassis jamoa boshqaruvini o‘z qo‘liga olish uchun Dushanbega (Tojikiston) boradi.
"Boshqa variantlar ham bor edi, lekin men Tojikistonni afzal ko‘rdim", — dedi Cherevchenko.
Rossiyada murabbiy sifatida ishlagan Igor Cherevchenko Moskvaning “Lokomotiv”, Kaliningradning “Baltika”, Tulaning “Arsenal” va Moskva viloyatining “Ximki” klublarini boshqargan. 2014/2015 yilgi mavsumda “Lokomotiv” bilan Rossiya kubogini qo‘lga kiritgan.
“Istiqlol” Tojikistonning 11 karra chempioni, 9 karra Tojikiston kubogi sohibi, Tojikiston Superkubogining 10 karra sohibi. Klub ketma-ket to‘qqiz mavsum milliy chempionatda g‘olib chiqdi.
