«Everton» klubi va Angliya terma jamoasining so‘nggi paytlardagi alishtirib bo‘lmas posboniga aylangan Jordan Pikfordning bugungi darajasiga chiqishiga uning jonajon klubi - «Sanderlend»dan uchinchi marta «surgun» qilinishidan keyin «qora mushuklar» murabbiylaridan birining aytgan so‘zlari sabab bo‘lgan.
Har holda kiper o‘shanda o‘ziga o‘zi ont ichgandi... Demak, quyidagi hikoya inglizlarning mohir darvozaboni Jordan Li Pikfordga bag‘ishlangan.
Ont ichishga majburlagan piching
«Sanderlend» - Pikfordning jonajon klubi. Biroq o‘z debyutini nishonlash va talab darajasida o‘yin ko‘rsatishga u 2015|2016 yillar mavsumida muvaffaq bo‘ldi. Bungacha Jordan bir qator jamoalarda ijara asosida to‘p surdi. Uchinchi «surgun»dan keyin eshitgan gapi darvozabonni qattiq ranjitdi: «Sanderlend» murabbiylaridan biri menga shunday degandi: Quloq sol, o‘zing yaxshi yigitsan. Lekin bu yerda APL darajasiga chiqa olmaysan. Uning gapiga chiday olmadim va nima qilib bo‘lsa ham, maqsadimga erishaman, deb o‘zimga o‘zim ont ichdim».
Pikford ko‘p sonli ijaralardan xafa bo‘lmadi
Jordanning dastlabki ijara jamoasida professional sportga xos bo‘lmagan haqoratni eshitgan, lekin o‘zini tiyishga kuch topa olgandi: «Ha, yetarlicha muxlislarga ega bo‘lmagan qashshoq klub. Biroq ular tanqidni ham o‘rniga qo‘yadilar. Darvozamdan to‘p o‘tkazib yuborganimdan keyin bir qariya bor ovozi bilan baqirdi: Pikford, qanaqa hayvonson, o‘zi!»
Klub manfaati uchun ta’tildan voz kechdi
Jordan 2015 yilda milliy terma jamoada debyutini nishonlagan. O‘sha paytda u xususiy uy qurish maqsadida yer sotib olgandi. Ma’lum muddat ijarada yashadi, keyin onasining qistovi bilan oilasiga qaytdi. Ko‘chib o‘tish terma jamoa chorlovi vaqtiga to‘g‘ri keldi - Tom Xitonning jarohatidan keyin unga qo‘ng‘iroq bo‘ldi. 2017 yilda esa Pikford «Everton»ga o‘tdi. Yangi jamoaga tezroq borish maqsadida ma’shuqasi bilan o‘tkazayotgan ta’tilni 1,5 haftaga qisqartirdi.
Muxlislarni g‘azablantirib, javobiga o‘z uyining suratini oldi
2015 yilda Jordan «Preston»ga yo‘l oldi. O‘sha kunlarda elitadagi o‘rni uchun kurashayotgan «Sanderlend» birinchi davradagi eng yorqin g‘alabasiga erishgan, azaliy raqibi - «Nyukasl» darvozasiga 3ta javobsizgol urgandi. Bundan mamnun bo‘lgan Pikford tvitterda «hakkalar»ni omadsizlar, deb atagandi.
Unga ham ruhshunos zarur, zararli taomlar ham
2019|2020 yil mavsumi Pikford uchun juda og‘ir kechgandi - tanqidlar bo‘roni va kuchli raqobat darvozabonni ancha qiynab qo‘ygandi. Shu bois, asablarini avaylash maqsadida u ruhshunosga murojaat qildi: «Ha, menga uning ko‘magi kerak. Jamoadoshlarim menga shubha qilmasliklarini istayman. Aynan shu sababli ruhshunos bilan haftada 2 marta uchrashib yoki telefon orqali bog‘lanib, futbol, umuman, hayot mavzusida muloqot qilaman. U doimo aloqada».
U fastfudni xush ko‘radi
Bu masalada qahramonimiz shunday degandi: «Onam mehmonga kelishini aytganida, undan o‘zi bilan doner olib kelishini iltimos qilaman. U butun bir qopini ko‘tarib keladi. Sevimli taomni ko‘p iste’mol qilib, ko‘pincha parhezni unutib qo‘yaman. Xayriyatki, «Everton»da bizni ko‘p yugurtiradilar va men ortiqcha yog‘lardan forig‘ bo‘laman».
R.IBROHIMOV tayyorladi
