Madridning «Atletiko» klubi «Barselona»dan gollandiyalik hujumchi Memfis Depay bilan shartnoma imzolaganini rasman e’lon qildi.
28 yoshli hujumchining transfer qiymati 3 million yevroni tashkil qilgan va futbolchining o‘zi «matraschilar» bilan 2025 yilning yoziga qadar shartnoma imzolagan.
Joriy mavsumda Depay «ko‘k-anorranglilar» tarkibida to‘rtta o‘yin o‘tkazib, bitta gol urdi. Avvalroq gollandiyalik futbolchi «PSV», «Manchester Yunayted» va «Lion» klublari sharafini ham himoya qilgan.
«Barselona» ayni dam La Liga turnir jadvalida «Atletiko»dan 13 ochko oldinda bormoqda. Shu bilan birga kataloniyaliklar madridliklardan bir o‘yin kam o‘tkazishgan.
