«Arsenal» «Spesiya» himoyachisi Yakub Kiviorning transferi borasida to‘liq kelishib oldi, deya xabar beradi jurnalist Fabrisio Romano.

Manbaga ko‘ra, ingliz klubi 22 yoshli polyak uchun turli bonuslarni hisobga olmaganda 20 million yevro to‘laydi. Transfermarkt portali himoyachini 8 million yevroga baholamoqda.

Oldinroq Kiviorga Dortmundning «Borussiya» klubi ham qiziqish bildirayotgani, Polsha terma jamoasi futbolchisi uchun 22 million yevro taklif qilgani xabar qilingandi.

Joriy mavsumda himoyachi «Spesiya» tarkibida 20 ta o‘yin o‘tkazib, gol urolmadi. «Arsenal» ayni dam APL turnir jadvalida 18-turdan keyin 47 ochko bilan peshqadamlik qilmoqda.

«Kanonirlar» eng yaqin ta’qibchisi «Manchester Siti»dan 5 ochko oldinda, londonliklarda bitta o‘yin ko‘proq.