Bosniyalik Miralem Pyanich 2016-2020 yillar oralig‘ida «Yuventus» bilan qo‘lga kiritgan barcha sovrinlarini g‘urur bilan eslaydi.
Faoliyatini BAAning «Sharja» klubida davom ettirayotgan futbolchi Turinda 4 marta skudetto sohibiga aylanishdan tashqari, Italiya kubogi (2 bora) va superkubogini ham boshi uzra baland ko‘targandi. «Murabbiy Allegri har doim takrorlaganidek, vaqt o‘tishi bilan g‘alaba qozonish g‘ayrioddiy narsa ekanligini tushunasiz. Afsuski, biz barchasini oddiy qabul qila boshlagandik...», - dedi Miralem Turin superklubi rasmiy saytiga bergan intervyusida. Umuman, «Yuventus» hamon uning qalbida, deylik, hozir BAAda ham jamoani muntazam kuzatib boradi.
- Miralem «Sharja»da faoliyatingiz qanday ketyapti?
- Hammasi zo‘r: Dubayda yashayapman. Muhimi, g‘ayratim baland: bor kuchimni berish va imkoni bor har qanday sovrinlarga ega chiqish, xususan, OCHLda o‘ynashni xohlayman. Bu turnir darajasi ancha yuqori. Ha, Yevropanikidan farqlanadi, lekin menga juda yoqdi. Umuman, Amirliklarda hammasi a’lo: klubning tashkiliy ishlari juda yaxshi, ajoyib murabbiy ham bor. To‘g‘risi, bu yerdagi muhitdan biroz hayratdaman - gap yo‘q.
- Ronaldu ham yaqinda arab diyoriga yuzlandi...
- Krishtianu katta ambisiyaga ega «Al-Nasr»ga o‘tdi. Ishonchim komil, Yaqin Sharqda futbol kelajagi zo‘r. Zero, aksariyat mamlakatlarda imkoniyatlar yetarli, faqat hozircha ularning barchasidan foydalanilmagan. Qisqasi, Krishtianu tanlovidan umuman hayron qolmadim, Saudiya Arabistoni futboli darajasi odamlar o‘ylagandek past emas. Menimcha, u mamlakat futboliga yanada kuchli turtki beradi. Bunda Saudiya imidji va arab bolalarida qiziqish ortishini nazarda tutyapman.
- «A» seriya haqida nima deya olasiz, chempionat o‘yinlariga hali ham qiziqasizmi?
- Albatta! Muntazam kuzatyapman, deylik, «Yuve»ning deyarli barcha o‘yinlarini ko‘rdim.
- «Byankonerlar»ning g‘alabali seriyalari sizni ajablantirdimi?
- Yo‘q! Xuddi shunday bo‘lishini sezgandim. Ha, yigitlar avvaliga qiyinchilikka duch kelishdi. Bunday payt qaysi raqib bilan o‘ynashingning ahamiyati yo‘q: «PSJ» bo‘ladimi yoki «A» seriya autsayderi - hammasi bir xil ko‘rinadi. O‘ylashimcha, jamoa qo‘rquv va noaniqlik ta’sirida shunday holatga tushadi ko‘pincha. Lekin har doim aytganman, Allegridan boshqa hech kim bu vaziyatni o‘zgartirolmasdi. Mana, umumiy holat yana barqarorlashdi, chunki Allegri «Yuve»ni to‘g‘ri yo‘lga qaytardi. Ammo ehtiyotkorlikni unutmaslik kerak: mavsumning eng qiyin qismi oldinda. Har qanday holatda, oyoqqa turib olgach, muvozanatni ushlash, barqaror tarzda ochko to‘plash va ishlashda davom etish talab etiladi. Menimcha, mart oyiga borib, ko‘p narsa oydinlashib qolsa kerak.
- Xo‘sh, Allegri murakkab vaziyatdan chiqish yo‘lini qanday topdi?
- Avvalo, mavsum davomida hamisha qiyinchilik yuzaga kelishini hisobga olgani hisobiga. Albatta, har bir murabbiy hammasi silliq kechishiga umid bog‘laydi, shuning barobarida ehtimoliy omadsizliklarga qarshi chora ham izlaydi, albatta. «Yuve»da yana tashqi bosim ham kuchli: jamoa hamisha g‘alaba qozonishi, yetakchilar qatorida yurishi shart. Asosiysi, Allegri futbolchilar ruhiyatiga qanday ta’sir o‘tkazishni yaxshi biladi, «bo‘ron» payti ham xotirjamlikni saqlaydi. Uning Italiya futboli tarixidagi eng muvaffaqiyatli murabbiylardan biri ekanligi bejiz emas. G‘alaba va mag‘lubiyatlar o‘z yo‘liga, Massimiliano turli holatlarga tayyor turadi, jamoada muvozanatni yaxshi ushlaydi. Yana bir tomoni, Allegri na jarohatlar va na boshqa muammolardan shikoyat qiladi. Faqat ixtiyoridagi tarkib bilan kifoyalanadi hamisha. Shuning evaziga rahbariyat almashgan paytdagi ulkan inqirozni bartaraf etdi. Qisqasi, «Yuve»ning kurashga qaytganida murabbiyning xizmati katta.
- Spalletti haqida qanday fikrdasiz?
- Ochig‘i, menga shu murabbiy masalasida omad kulib boqmadi, axir u bilan atigi 6 oy ishladim. Muhimi, shu qisqa vaqtda chinakamiga rohatlandim. Spalletti futboli chindan ham, juda qiziqarli. «Napoli»ning hozirgi natijalarida ajablanadigan tomoni yo‘q. Har doim uning jamoasi o‘yinini tomosha qilish yoqimli. «Napoli» haqli ravishda 1-o‘rinda bormoqda. Bor gap shu.
- Spallettining asosiy sifatlarini ayta olasizmi?
- Bosh belgisi - himoya va hujumda bir xil ishlash. Luchanoda o‘yin tuzilmalari va futbolchilar manyovrlari bo‘yicha rejalar sanoqsiz, shuning hisobiga maydonda quvnoq futbolni yo‘lga qo‘yadi. Shogirdlari esa qanday harakatlanish kerakligini yaxshi bilishadi. O‘yinda muammo yo‘qmi, demak, bu Spallettining jamoani puxta tayyorlaganidan dalolat. Bu murabbiy o‘ta talabchan, shuning barobarida futbolchilarga ko‘p narsa beradi ham. Spallettining yana bir jihati, nomlarga aslo qaramaydi - unga sizning kimligingiz mutlaqo ahamiyatsiz. Faqat qanday o‘ynashingizga qaraydi, tamom.
- Pirlo ortidan Pyanich... «Yuventus» siz ketganingizdan buyon munosib dirijyor qidirmoqda. Allegri ayni payt e’tiborini ko‘proq Lokatelliga qaratmoqda, garchi Paredes ham bo‘lsada. Bu borada biror maslahatingiz bormi?
- Ha, mendan oldin Pirlo bor edi, aynan shu pozisiyada faoliyatimning yuqori nuqtasiga chiqdim: skudetto yutdik, CHL finalida o‘ynadik. O‘ylaymanki, futbolchi bu rolda mas’uliyatni to‘liq zimmasiga olishi, faqat jamoa uchun ishlashi kerakligini tushunishi kerak. Bunda kreativlik kiritishingiz, o‘zgacha harakatlanishingiz, asosiysi, maydonda ustunlikni ta’minlash uchun tezkor qaror qabul qilishingiz talab etiladi. Yana ba’zi xatolarga qaramay, faqat oldinga intilishingiz muhim. Qolgani Allegri ko‘rsatmalarini qanday bajarishingizga bog‘liq.
- Pyanichni Italiyada yana ko‘rishimiz mumkinmi?
- Ha! Hali qaytaman, chunki Italiyani yaxshi ko‘raman. Qishki transferlar bozoridami? Bilmayman, hali hech kim qo‘ng‘iroq qilgani yo‘q...
- Hozir Dubay - deyarli orzular makonida yashayapsiz. Barchasi urushlar domidagi Bosniyada boshlanganini o‘ylasak...
- Hayotda cho‘qqilarni zabt etish yo‘lida qancha ter to‘kkanim o‘zimga ayon. Bunga butun borlig‘imni bag‘ishladim. Bugun boshqa qit’adaman, asosiysi, hamon o‘zimga yoqqan ish bilan mashg‘ulman. Butsalarimni mixga ilganimdan keyin ham futbol olamida qolaman. Hammasi tush kabi. Axir Yevropaning eng katta klublarida o‘ynadim: Fransiya, Italiya, Ispaniya va Turkiyada. Qanday yo‘lni bosib o‘tganimni aslo unutmayman - bu yoqimli tajriba. Bosniyadagi urushdan qochib, Lyuksemburgga bordim, shu mitti mamlakatda katta ishtiyoq bilan ishga kirishdim, yakunda «Lion», «Roma», «Yuventus», «Barselona», «Beshiktosh» klublarini ko‘rdim. Bu o‘zim va oilam uchun - sharafli yo‘l. Endi BAAda yashab, o‘g‘limga qadriyatlarni yetkazishga harakat qilyapman.
MUHAMMADXON tayyorladi
