Ronaldu naq 630 ming funt turadigan, "Jacob & Co." tomonidan ishlangan qo‘lsoatga ega bo‘ldi. Bu soat unga Saudiya Arabistoniga o‘tishini nishonlash paytida sovg‘a sifatida berilgan. 37 yoshli hujumchi oy avvalida "An-Nasr"ga ko‘chib o‘tgandi. Endilikda portugaliyalik O‘rta Sharqda yiliga 173 million funt-sterling oladi. Sovg‘a qilingan "vaqt o‘lchagich" o‘ziga xosligi bilan ajralib turadi. Uning rangi yam-yashil bo‘lib, Saudiya Arabistoni bayrog‘ini eslatadi. Shuningdek, yashil rang Islom ramzi ham sanaladi.
Ronaldu "Jacob & Co." kompaniyasi bilan hamkorlik qiladi. Korxona futbolchiga atab, soatni maxsus usulda yasagan. Qayd etilishicha, qo‘lsoatda 338 ta qimmatbaho toshlar mavjud. O‘lchami: 47 mm × 15,85 mm. Narxi esa yuqorida qayd etilganidek, 630 ming funtga teng.
Ronaldu soatni allaqachon o‘z Instagram sahifasiga joylab qo‘ygan. Futbolchi uni omad keltirishiga umid qilmoqda. Ammo uning yangi jamoadagi debyut o‘yinlari rejadagidek kechmadi. Ayni damda "An-Nasr" o‘z mamlakatida yetakchilik qilmoqda. Ammo Ronaldu oxirgi bahsda gol ura olmay maydonni tark etgandi.
Krishtianu Ronaldu o‘tgan haftada "PSJ" bilan norasmiy bahsda ikkita golga mualliflik qildi. Hisob esa 5-4 bilan parijliklar foydasiga hal bo‘lgan.Ronalduga yana imkoniyat taqdim etilgandi. Unda Ronaldu va uning jamoadoshlari "Al-Ittihod"ga 3-1 hisobida imkoniyatni boy berishdi.
ISMATOV J.
