"Inter" bosh murabbiyi Simone Indzagi Milan Shkrinyarning holati haqida gapirdi.

Bungacha jamoada muhim rol o‘ynagan markaziy himoyachi Italiya kubogi chorak finalida “Atalanta”ga (1:0) qarshi o‘yinda qaydnomaga kiritilmadi. Bugun ma’lum bo‘ldiki, slovakiyalik futbolchi yanvar oyida "Inter"ni tark etmaydi, balki mavsum yakunida erkin agent sifatida "PSJ"ga o‘tadi.

"Men Shkrinyarni vaqtinchalik tarkibdan chetlashtirishga qaror qildim, ammo bizda u bilan hech qanday muammo yo‘q. U 30 iyungacha "Inter" futbolchisi bo‘lib qoladi, mashg‘ulotlarda bor kuchini beradi, chunki u professional. U keyingi o‘yinlarda maydonga tushadimi? Vaziyatga qarab o‘yin oldidan qaror qabul qilaman", - dedi Indzagi Sportmediaset nashriga bergan intervyusida.