Kecha tunda «Old Trafford»da Angliya Liga kubogi 1/2 finalining javob uchrashuvi yakunlandi. «Manchester Yunayted» va «Nottingem Forest» ushbu bosqichda o‘zaro bahslashdi.
O‘yinda Erik Ten Xag shogirdlari 2:0 hisobida g‘alaba qozondi. Shu tariqa «mankunianliklar» turnir finaliga yo‘l oldi.
«Manchester Yunayted» sardori Bruno Fernandesh uchrashuv natijasidan mamnun bo‘ldi va finalga chiqish jamoa uchun 2022/2023 yilgi mavsumni yorqin ko‘rsatish uchun yaxshi imkoniyat bo‘lishini aytdi.
«Bu juda ham yaxshi natija. Bu yerdaligimda shu paytgacha bir marta finalgacha yetib kelganman. O‘shanda afsuski, g‘alaba qozona olmaganmiz.
Hozir yangi imkoniyat bor. Menga klubning o‘yini yoqdi, gollar yoqdi. Biz haqli ravishda g‘alaba qozondik», - dedi Fernandesh.
