Barselona sudi “Barselona”ning sobiq himoyachisi Dani Alvesga nisbatan ehtiyot chorasini tanlashda uning aybiga oid dalillar yetarlicha bo‘lgan deb hisobladi, deb yozadi “RIA Novosti Sport”.
Alves 2022 yil 30 dekabr kuni Barselonadagi tungi klubda uchrashgan qizni zo‘rlaganlikda ayblanmoqda. 39 yoshli futbolchi 20 yanvar kuni qo‘lga olinib, hibsga olingan. Agar Alves aybdor deb topilsa, u 4 yildan 12 yilgacha qamoq jazosiga hukm qilinishi mumkin.
Manbaga ko‘ra, sudya Anna Marin ehtiyot chorasini tanlash to‘g‘risidagi qarorda Alvesning aybiga oid dalillar yetarlicha bo‘lganini yozgan.
Avvalroq Braziliya terma jamoasi sobiq himoyachisining rafiqasi ajrashish uchun ariza berishga qaror qilgani malum bo‘lgandi.
21 yanvar kuni Meksikaning "Pumas" jamoasi Alvesh bilan shartnomani bekor qilganini e’lon qildi. Futbolchi jamoada 2022 yilning iyunidan buyon o‘ynab kelmoqda.
