Erik ten Xag hozir "Manchester Yunayted"ni har tomonlama qayta qurmoqda. Ammo u yozda tarkibning ayrim futbolchilariga javob berishga majbur. Chunki ularning shartnomasi yakuniga yetadi. "Qizil iblislar" bu mavsumda o‘zini tiklab, kerakli pog‘onaga ko‘tarila oldi. Quyida jamoa yo‘qotishi mumkin bo‘lgan futbolchilar haqida so‘z boradi.

David De Xea

"MYU"da sodiq posbonining bitimini yana bir mavsumga cho‘zish imkoni bor. Ammo hozircha bu borada gap-so‘zlar mavjud emas. Aftidan ten Xag klubdan ortiqcha pul ketishini istamayapti. Chunki De Xea haftasiga 375 ming funt maosh oladi. Balki mavsum so‘ngiga qadar ispan futbolchisi yangi shartnoma tuzar. Buyog‘ini vaqt ko‘rsatadi.

Aksel Tuanzebe

25 yoshli himoyachi "Manchester Yunayted" safidagi so‘nggi bahsini 2021 yilda, Yevropa ligasi finalida o‘tkazgandi. Shundan keyin u "Napoli"ga ijaraga ketadi. U yerda ham Akselning omadi chopmadi va qaytib keldi. Ayni damda himoyachi "Stok Siti"da ijara asosida harakat qilmoqda. U yozda katta ehtimol bilan jamoadan ketadi.

Fil Jons

Jons "qizil iblislar" safida jami 200 dan ortiq bahslarda ishtirok etgan. Ammo so‘nggi bir necha yilda himoyachi zaxiraga mixlanib qolgandi. U o‘tgan yili qishda, ikki yillik tanaffusdan keyin ilk rasmiy o‘yinda maydonga tushdi. Jonsning bu klubdagi sarguzashtlari vanihoyat 12 yildan keyin tugaydi.

Tom Xiton

Xiton 2021 yilning yozida jamoaga olib kelingan. U De Xea va Din Xendersonga o‘rinbosar bo‘lishi kerak edi. Darvozabon jamoaga kelganidan beri bor-yo‘g‘i 2 ta o‘yinda maydonga tushirildi. Shulardan biri "Charlton"ga qarshi kubok bahsida yuz bergan va "MYU" 3-0 hisobida zafar quchgan. Rahbariyat Xitonni yana qo‘shimcha bir yil jamoada olib qolish huquqiga ega. Ammo bu imkoniyatdan foydalaniladimi yoki yo‘q, bu so‘roq ostida.

ISMATOV J.