Эрик тен Хаг ҳозир "Манчестер Юнайтед"ни ҳар томонлама қайта қурмоқда. Аммо у ёзда таркибнинг айрим футболчиларига жавоб беришга мажбур. Чунки уларнинг шартномаси якунига етади. "Қизил иблислар" бу мавсумда ўзини тиклаб, керакли поғонага кўтарила олди. Қуйида жамоа йўқотиши мумкин бўлган футболчилар ҳақида сўз боради.

Давид Де Хеа

"МЮ"да содиқ посбонининг битимини яна бир мавсумга чўзиш имкони бор. Аммо ҳозирча бу борада гап-сўзлар мавжуд эмас. Афтидан тен Хаг клубдан ортиқча пул кетишини истамаяпти. Чунки Де Хеа ҳафтасига 375 минг фунт маош олади. Балки мавсум сўнгига қадар испан футболчиси янги шартнома тузар. Буёғини вақт кўрсатади.

Аксель Туанзебе

25 ёшли ҳимоячи "Манчестер Юнайтед" сафидаги сўнгги баҳсини 2021 йилда, Европа лигаси финалида ўтказганди. Шундан кейин у "Наполи"га ижарага кетади. У ерда ҳам Акселнинг омади чопмади ва қайтиб келди. Айни дамда ҳимоячи "Сток Сити"да ижара асосида ҳаракат қилмоқда. У ёзда катта эҳтимол билан жамоадан кетади.

Фил Жонс

Жонс "қизил иблислар" сафида жами 200 дан ортиқ баҳсларда иштирок этган. Аммо сўнгги бир неча йилда ҳимоячи захирага михланиб қолганди. У ўтган йили қишда, икки йиллик танаффусдан кейин илк расмий ўйинда майдонга тушди. Жонснинг бу клубдаги саргузаштлари ваниҳоят 12 йилдан кейин тугайди.

Том Хитон

Хитон 2021 йилнинг ёзида жамоага олиб келинган. У Де Хеа ва Дин Хендерсонга ўринбосар бўлиши керак эди. Дарвозабон жамоага келганидан бери бор-йўғи 2 та ўйинда майдонга туширилди. Шулардан бири "Чарлтон"га қарши кубок баҳсида юз берган ва "МЮ" 3-0 ҳисобида зафар қучган. Раҳбарият Хитонни яна қўшимча бир йил жамоада олиб қолиш ҳуқуқига эга. Аммо бу имкониятдан фойдаланиладими ёки йўқ, бу сўроқ остида.

ИСМАТОВ Ж.