Braziliya futbolida navbatdagi noodatiy manzara: braziliyalik erkak muxlislarning o‘yin payti stadionga kirishlari taqiqlandi, ammo bu tribinalardagi jo‘shqinlikka bir gramm ham ta’sir qilgani yo‘q.
Chunki ayollar va qizlar 42 ming tomoshabinga mo‘ljallangan stadion tribunalarini liq to‘ldirib, yanada yorqinroq shou ko‘rsatishdi.
Oldinroq «Atletiko Paranaense» fanatlari ishtirokida ommaviy mushtlashuv yuz bergan va Braziliya futbol konfederasiyasi keyingi o‘yinlarda erkaklarni arenaga qo‘ymaslik xususida qaror chiqargandi. Bu - braziliyaliklar uchun no‘ta jiddiy jazo. Klub baxtiga, mahalliy futbol tashkiloti ayollar, qizlar va bolalar uchun taqiq joriy qilgani yo‘q.
Ko‘rinishidan, Braziliya konfederasiyasi voqelik boshqacha rivojlanishini aslo kutmagan, shekilli. Har holda, sig‘imi 42 mingga teng «Paranaense» arenasi faqat qizlar bilan to‘ldi. Eng qizig‘i, klub rahbariyatining o‘zgacha yondashuvi: stadionga kirish chiptalari tez buzilmaydigan oziq-ovqat mahsulotlari bilan almashtirildi. Aniqrog‘i, 1 kilogramm mahsulot evaziga 1 dona chipta berildi. Eh, bechora erkak muxlislar, ular faqat futbolsiz emas, ayollarisiz va ovqatsiz ham qolishdi. Ehtimolki, bu «Paranaense» tarixi va uning futbolchilari hayotidagi eng g‘ayrioddiy o‘yindir.
