Бразилия футболида навбатдаги ноодатий манзара: бразилиялик эркак мухлисларнинг ўйин пайти стадионга киришлари тақиқланди, аммо бу трибиналардаги жўшқинликка бир грамм ҳам таъсир қилгани йўқ.
Чунки аёллар ва қизлар 42 минг томошабинга мўлжалланган стадион трибуналарини лиқ тўлдириб, янада ёрқинроқ шоу кўрсатишди.
Олдинроқ «Атлетико Паранаэнсе» фанатлари иштирокида оммавий муштлашув юз берган ва Бразилия футбол конфедерацияси кейинги ўйинларда эркакларни аренага қўймаслик хусусида қарор чиқарганди. Бу - бразилияликлар учун нўта жиддий жазо. Клуб бахтига, маҳаллий футбол ташкилоти аёллар, қизлар ва болалар учун тақиқ жорий қилгани йўқ.
Кўринишидан, Бразилия конфедерацияси воқелик бошқача ривожланишини асло кутмаган, шекилли. Ҳар ҳолда, сиғими 42 мингга тенг «Паранаэнсе» аренаси фақат қизлар билан тўлди. Энг қизиғи, клуб раҳбариятининг ўзгача ёндашуви: стадионга кириш чипталари тез бузилмайдиган озиқ-овқат маҳсулотлари билан алмаштирилди. Аниқроғи, 1 килограмм маҳсулот эвазига 1 дона чипта берилди. Эҳ, бечора эркак мухлислар, улар фақат футболсиз эмас, аёлларисиз ва овқатсиз ҳам қолишди. Эҳтимолки, бу «Паранаэнсе» тарихи ва унинг футболчилари ҳаётидаги энг ғайриоддий ўйиндир.
