Polsha tashqi ishlar vaziri o‘rinbosari Pavel Yablonskiy mamlakat mutasaddilarini agar Rossiya va Belarus sportchilariga neytral maqomda turnirlarga ruxsat berilsa, 2024 yilgi yozgi Olimpiada o‘yinlarini boykot qilishga chaqirdi.
Avvalroq Xalqaro olimpiya qo‘mitasi (XOQ) rossiyalik va belaruslik sportchilarni xalqaro musobaqalarga qat’iy qoidalarga rioya qilgan holda qabul qilish masalasi ko‘rib chiqilishini ma’lum qilgandi. Ya’ni bunda rus muxlislari o‘z sportchilarini faol qo‘llab-quvvatlamasliklari kerak.
«Agar Rossiya va Belarus sportchilarining 2024 yilgi Olimpiya o‘yinlarida ishtirok etishlariga ruxsat berilsa, o‘yinlarni shunchaki boykot qilish kerak, bunday o‘yinlarda qatnashmaslik kerak. Biz XOQga bosim o‘tkazishimiz kerak.
Sport federasiyalari hukumatlardan mustaqil faoliyat yuritgani uchun o‘zlari qaror qabul qiladilar. Lekin men, albatta, barchani shunday qaror qabul qilishga chaqiraman», - dedi Yablonskiy.
