Польша ташқи ишлар вазири ўринбосари Павел Яблоньский мамлакат мутасаддиларини агар Россия ва Беларус спортчиларига нейтрал мақомда турнирларга рухсат берилса, 2024 йилги ёзги Олимпиада ўйинларини бойкот қилишга чақирди.
Аввалроқ Халқаро олимпия қўмитаси (ХОҚ) россиялик ва беларуслик спортчиларни халқаро мусобақаларга қатъий қоидаларга риоя қилган ҳолда қабул қилиш масаласи кўриб чиқилишини маълум қилганди. Яъни бунда рус мухлислари ўз спортчиларини фаол қўллаб-қувватламасликлари керак.
«Агар Россия ва Беларус спортчиларининг 2024 йилги Олимпия ўйинларида иштирок этишларига рухсат берилса, ўйинларни шунчаки бойкот қилиш керак, бундай ўйинларда қатнашмаслик керак. Биз ХОҚга босим ўтказишимиз керак.
Спорт федерациялари ҳукуматлардан мустақил фаолият юритгани учун ўзлари қарор қабул қиладилар. Лекин мен, албатта, барчани шундай қарор қабул қилишга чақираман», - деди Яблоньский.
