"Inter" ustozi Simone Indzagi Italiya A Seriyasi doirasida "Milan"ga qarshi bo‘lib o‘tadigan uchrashuv haqida fikr bildirdi.

"Biz uchun hech narsa o‘zgarmadi, bu o‘zgacha o‘yin. “Napoli”ga yaqinlashib, ta’qibchilarimizdan uzoqlashishni istasak, har bir ochko biz uchun muhim. Bizni faqat "Inter" bilan nima sodir bo‘lishi qiziqtiradi", - dedi Indzagi La Gazzetta dello Sport bilan suhbatda.

Indzagining ta’kidlashicha, bunday uchrashuvlarda ko‘p narsa hakam yoki murabbiylardan birining individual qaroriga bog‘liq. "Neradzurrilar" ustozi jamoadan barcha muammolarni chetga surib, prinsipial raqibga qarshi o‘yinda ijobiy natijaga erishishini kutmoqda.

Eslatib o‘tamiz, "Milan derbisi" ertaga, 6 fevral kuni bo‘lib o‘tadi. Uchrashuv Toshkent vaqti bilan 00:45 da boshlanadi.