Saudiya Arabistonining «Ash-SHabab» klubi bosh murabbiyi Visente Moreno Osiyo chempionlar ligasi nimchorak final bosqichidan o‘rin olgan «Nasaf»ga qarshi o‘yin oldidan o‘z fikrlarini bildirib o‘tdi.

"Biz chorak finalda kim bilan to‘qnash kelishimiz mumkinligi haqida ko‘p gaplar bo‘ldi. Ammo ushbu bosqichga yetib kelgan har bir klub yaxshi saviyadagi jamoa hisoblanadi. Shuning uchun dastlab "Nasaf" to‘sig‘idan o‘tib olishimiz kerak bo‘ladi.

Biz hozirda chorak final haqida o‘ylamayapmiz. Bor e’tiborimizni "Nasaf"ga qarshi bahsga qaratganmiz. Maqsadimiz — ertaga g‘alaba qozonish. "Nasaf" — yaxshi jamoa. Ular safida iqtidorli yosh futbolchilar bor va jamoa taktik jihatdan yaxshi harakat qiladi. Shu bois, hozir yaxshi formada bo‘lishimizga qaramay, raqibni mensimaslik holatiga yo‘l qo‘yib bo‘lmaydi. Aks holda buning uchun jazolanishimiz mumkin.

"Mazkur o‘yinga tayyorgarlik ko‘rish uchun yetarli vaqtga ega bo‘ldik. Biz o‘z maqsadimizga erishishimizga ishonchim komil", — dedi Moreno.