Bugun Qibray tumani markazidagi stadionda Superliga jamoalari – Bekobodning «Metallurg» hamda Jizzaxning «So‘g‘diyona» jamoalari o‘rtasida nazorat-ko‘rik uchrashuvi o‘tkazildi. Qiziqarli va murosasiz kurashlar ostida kechgan o‘yinda «Metallurg» kichik hisobda g‘alaba qozondi. Uchrashuv taqdirini hal etgan yagona gol o‘yin oxirida kiritildi. Zabixullo O‘rinboyevning ajoyib to‘p uzatishidan keyin Bektemir Abdumannonov raqib darvozaboni bilan yakkama yakka chiqdi va g‘alaba to‘pini kiritdi – 1:0.

Bevosita o‘yin tafsilotlari to‘xtaladigan bo‘lsak, birinchi bo‘limda teng kurash kechdi. To‘p nazoratida, vaziyatlar yaratishda jizzaxliklar biroz ustunlikka ega bo‘lishdi. Birinchi bo‘lim so‘ngida Javohir Qahramonovning maydondan chetlatilishi «So‘g‘diyona» o‘yiniga salbiy ta’sir ko‘rsatdi. Shundan so‘ng tashabbus bekobodliklar tomonida bo‘ldi. Ikkinchi bo‘lim avvalida Xudoyshukur Sattorov chap qanotdan uzatib berilgan to‘pni boshi bilan urib raqib darvozasi to‘riga tushirgandi. Ammo qanot hakami bu vaziyatda ofsayd borligini qayd etdi. Uchrashuv tugashiga olti daqiqa qolganda esa zahiradan o‘yinga qo‘shilgan Zabixullo aqlli to‘p oshirishi bilan jamoadoshiga qulay vaziyat yaratib berdi. «Metallurg» to‘purari esa imkoniyatdan unumli foydalandi.

Milliy chempionat boshlangunga qadar «Metallurg» yana bitta nazorat uchrashuvini rejalashtirgan.

Nazorat o‘yini
«Metallurg» – «So‘g‘diyona» – 1:0. Qibray stadioni
Gol: Bektemir Abdumannonov (84)
Hakam: Sultonmurod Abdurahmonov.
Nazoratchi: Aleksandr Popov.