"Inter" yarim himoyachisi Xoqon Chalxano‘g‘lu Chempionlar ligasi 1/8 final dastlabki o‘yinida "Portu" ustidan qozonilgan g‘alaba (1:0) haqida fikr bildirdi.

"Muhim natijaga erishdik. Bunday jamoaga qarshi g‘alaba qozonish oson emas, lekin Romelu va sheriklarim tufayli biz bunga erishdik. Biroq, qarama-qarshilik hali tugamagan. Bizni Portugaliyada juda qiyin o‘yin kutib turibdi. U yerda g‘alaba qozonish uchun bor kuchimizni ishga solamiz. Chempionlar ligasi juda muhim turnir. Bu yerda juda qiyin uchrashuvlar bo‘ladi, lekin biz har safar kurashamiz. Lukaku uchun xursandman. Jarohatdan keyin unga oson bo‘lmadi. Endi u mo‘’jizalar yaratishi mumkinligini ko‘rsatmoqda. Bu biz uchun juda muhim", - dedi Chalxano‘g‘lu UYEFA matbuot xizmatiga.