Yevropa konferensiyalar ligasida 1/16 final bosqichi yakuniga yetib, keyingi bosqichda ishtirok etadigan 16ta jamoaning nomi aniq bo‘ldi. Endi esa navbat nimchorak final qur’asiga.

Qachon va qayerda?
Konferensiyalar ligasi nimchorak final bosqichiga qur’a tashlash marosimi bugun — 24 fevral, juma kuni UYEFA qarorgohi joylashgan Nyon shahrida bo‘lib o‘tadi. Marosim Toshkent vaqti bilan 18:00da boshlanadi.

Kimlar ishtirok etadi?
Qur’ada 16ta jamoa ishtirok etadi: 8ta jamoa Konferensiyalar ligasi guruh bosqichida 1-o‘rinni egallab, to‘g‘ridan-to‘g‘ri nimchorak final yo‘llanmasiga ega bo‘lgandi; yana 8ta jamoa 1/16 final bosqich o‘yinlaridan keyin nimchorak finalga o‘tdi.

Guruhda 1-o‘rinni egallagan jamoalar (1-savatcha):
"Alkmaar" (Niderlandiya)
"Vest Xem" (Angliya)
"Vilyareal" (Ispaniya)
"Istanbul Bashakshexir" (Turkiya)
"Nissa" (Italiya)
"Sivasspor" (Turkiya)
"Slovan" (Italiya)
"Yurgorden" (Shvesiya)

1/16 final bosqichidan o‘tgan jamoalar (2-savatcha):
"Anderlext" (Belgiya)
"Bazel" (Shveysariya)
"Lasio" (Italiya)
AYEK Larnaka (Kipr)
"Fiorentina" (Italiya)
"Gent" (Belgiya)
""Lex" (Polsha)
"Sherif" (Moldova)

Qur’a tartibi
Ikkinchi savatchadan jamoa tortiladi, so‘ngra 1-savatchadan ushbu jamoa raqibi aniqlanadi. Bu bosqichda bir mamlakat vakillari o‘zaro to‘qnash kelmaydi.

O‘yinlar
Ushbu bosqich ikkita o‘yindan iborat. Birinchi savatcha jamoasi javob uchrashuvini o‘z maydonida o‘tkazadi. Ikki o‘yin natijasiga ko‘ra, hisob teng bo‘lsa, qo‘shimcha bo‘limlar belgilanadi. Shundan keyin ham g‘olib aniqlanmasa, navbat penaltilar seriyasiga beriladi. Dastlabki o‘yinlar 9 mart, javob bahslari esa 16 mart kunlari o‘tkaziladi.

Keyin-chi?
G‘olib jamoalar chorak finalga yo‘l olishadi. Chorak final va yarim finalga qur’a tashlash marosimi 17 mart kuni bo‘lib o‘tadi. Mag‘lub bo‘lgan jamoalar uchun yevrokuboklar mavsumi yakuniga yetadi.