«Nyukasl» klubi muxlislaridan biri Angliya Liga kubogi finali chiptasini g‘ajib tashlagan Rudi laqabli itiga jiddiy hukm o‘qidi.
Sohibini final chiptasidan mahrum qilgan it sotiladi! Narxi ham tayin - atigi 5 funt sterling. Ajabo, bu hazilmi yoki...?
Angliya Liga kubogi finali chiptasidan ayrilgan «Nyukasl» muxlisining ism-sharifi - Alan Kerling. U 18 fevral kuni o‘tkazilgan «Nyukasl» - «Liverpul» o‘yinidan so‘ng uyiga tushkun kayfiyatda qaytdi. Binobarin, «qarg‘alar» 0:2 hisobida yutqazishdi, kamiga Eddi Xau jamoasining APLda 17ta o‘yinga cho‘zilgan mag‘lubiyatsiz odimi uzildi. Qarangki, alamzada fanat uyga kirgani hamono Angliya liga kubogi finaliga sotib olgan chiptasini burdalab tashlangan holatda ko‘rdi. Endi uning qanday jazavaga tushganini o‘zingiz tasavvur qilib olavering...
Xullas, Kerling o‘z itiga urush ochdi va «Feysbuk» tarmog‘ida uni sotuvga qo‘yganini e’lon qildi. «Bu - mening itim Rudi. Kichik yulduzchaga aylangan yaramas kuchukcha uyimizga pochta orqali yuborilgan xatlarni tajovvuzkor hujum sifatida ko‘rib, ularni o‘z o‘rnida yo‘qotishga tushadi. Mana, Rudi bu safar men yo‘qligimda «Uembli»ga kirish huquqini beruvchi chiptani chaynash tashlabdi. Ehtimol, u bu bilan meni kuldirmoqchi bo‘lgandir. Lekin hukm qat’iy - it 5 funt sterlingga sotiladi», - deb yozgan Alan Kerling Rudi suratini ham havola qildi. Ehtimol, bu hazildir, buni Alanning o‘zi biladi. Ma’lumot uchun, «Nyukasl» 26 fevral kuniga belgilangan Angliya liga kubogi finalida «MYU»ga qarshi o‘ynaydi.
